Remera, KG 11 AVE Ingenzi House - +250 785 063 763 - @RasalYEmpower - @RasalYEmpower
Ikinyarwanda English Fran├žais

Tumenye ubuskuti icyo ari cyo

RASAL
General Baden Powell agenzura umutwe w'Abaskuti i Hastings Park mu 1910

Iyo uganiriye n’abantu banyuranye, usanga abenshi bafite ishusho y’ubuskuti ku buryo bucagase, ndetse hari n’abo usanga bafite imyumvire bitirira ubuskuti nyamara idafitanye isano n’icyo ubuskuti ari cyo. Muri iyi nyandiko turagerageza gusobanura icyo ubuskuti ari cyo ndetse tunihatire gucengera icyo ubuskuti bugamije nkuko Umubyeyi w’Abaskuti Baden Powell yabibonaga.

Tumenye ubuskuti icyo ari cyo

Ubuskuti ni uburyo bwo gutoza ingimbi n’abangavu uburere mboneragihugu ushingiye, kandi ukifashisha kubahiriza itegeko rya giskuti, gukorera mu matsinda, imikino no kuba mu bidukikije.

Iryo tegeko risobanura umuskuti nk’umuntu wubahiriza icyo avuze, ufite umucyo, wubaha amategeko, wumvira abamukuriye, ubanira neza bagenzi be, usabana n’abandi akagira ubutwari, ukunda ibidukikije, agakunda mugenzi we, kandi agahora iteka yiteguye gufasha. Iri tegeko niryo nkingi y’ubuskuti, maze umuskuti akiyemeza, nta gahato, kurigira ikirango cy’ubuzima bwe igihe akoze isezerano ku giti cye atabitegetswe cyangwa ngo abihatirwe n’abandi.

Imikino no kuba mu bidukikije ni ngombwa cyane ku buskuti. Ubusanzwe imikino ni igikorwa kibangukira abakiri bato. Iyo imikino ikorewe hanze inagura ubuzima, yigisha ubworoherane ikanatoza gufatanya. Ingando ikorewe hanze mu bidukikije niyo ubuzima bwa giskuti busenderezwamo.

Ubuskuti bwa Baden Powell burangwa n’amashami atatu:

Mu bahungu habamo ishami ry’abana bato (Ibirura) bazwi nk’abaruveto (louveteaux) : imyaka 9-12, ishami ry’ingimbi cyangwa intasi (éclaireur) : imyaka 12-17 n’ishami ry’abaskuti bakuru (routiers) : imyaka 17 gusubiza hejuru.

Mu bakobwa naho habamo ishami ry’abana bato bazwi ku izina ry’abaruvete cyangwa abajanete (Louvette ou Jeannette) : imyaka 9-12, ishami ry’abangavu bazwi ku izina ry’Abagide (Guide) : imyaka 12-17 n’ishami ry’abagide bakuru (guide-aînée) : imyaka 17gusubiza hejuru.

Icyitonderwa: ishami ry’abakuru ni uruvange.

Kuva mu ishami ujya mu rindi ni uruhererekane rw’ubuskuti mu mahame yabwo, mu migirire yabwo no mu ntego zabwo, buri shami ribereyeho guhuza ibikorwa by’ubuskuti n’igikuriro umwana agezemo (ubwana, ubugimbi n’ubukure). Cyakora mwibuke ko ubuskuti nyabwo umuntu abubamo mu mutwe w’ingimbi (troupe éclaireur) cyangwa mu mutwe w’abangavu (troupe guide).

Akamaro k’Ubuskuti

Nkuko Baden Powell abibwira abaskuti:  “Intego y’Abaskuti ni ‘Guhora witeguye’. Ibyo bivuze ko mugomba guhora iteka muri maso, kandi ko ku bw’umubiri igihe cyose muba mwiteguye gukora icyo mushinzwe …”.

Ubuskuti bumaze iki?

Ubuskuti butuganisha he?

Kuba abasirikari bato?

Birumvikana ko atari byo!

Akamaro nyamukuru k’ubuskuti ni uburere. Uburere bwa giskuti (bwa kigide ku bakobwa) bwibanda ku muskuti bumutoza kubaho mu bwisanzure.

Kurera umuskuti bigamije kumugira umuntu w’inyangamugayo, umuturage witangira  igihugu cye, umugabo wita ku nshingano ze… Umuntu ufite umutima ufasha abandi.

Dushobora kwihandagaza tukemeza ko ubuskuti bugamije kurera abantu b’intyoza (nkuko buri muntu wese yagombye kumera). Ariko icyo tugomba gufata, nuko ubuskuti bwugururiye amarembo abantu bose.

Abibeshya bakagereranya ubuskuti n’igisirikare, twababwira ko nubwo bwose byombi bisa ubirebeye inyuma – imiyoborere ishingiye ku nzego zirutana, impuzankano, kwiruka mu ishyamba – igisirikare gifite umugambi wo guhindura bose bakagira imyumvire imwe no kuburizamo umuntu ku giti cye hagamijwe kurema umutwe w’abantu bashoboye, mu gihe ubuskuti bubereyeho kwita ku muntu ku giti cye, ntibushake kumuburizamo mu bandi, ahubwo bumufasha kumenya ubushobozi bwe bwihariye, bukamuha uburere bufite ireme (ndetse budacagase na gato), kandi bwuzuza uburere ahabwa n’ababyeyi be.

Rero, igisirikare kigenewe ibikorwa by’intambara, mu gihe abaskuti bagize “umutwe w’ingabo z’amahoro”.

Intego z’ubuskuti

Ubuskuti bugamije kurera abantu bitangira igihugu n’igihe bagezemo, abantu bishimiye uko bariho n’abo bari bo, bashishikariye gukora kandi bagira uruhare ku iterambere rusange. Bityo rero uburere n’ibikorwa ubuskuti butegura biba bigamije kugera ku ntego z’ingenzi zikurikira:

1. Kumenya kwirwanaho

Gutoza umuskuti (urubyiruko) gusobanukirwa vuba iby’isi arimo.

Kumutoza kumenya guhanga udushya akoresheje neza ubushobozi yifitemo n’ingabire yahawe. Kubaka inkambi cyangwa ibindi, gusana inzu, gukora ibikoresho binyuranye, gukora ikinamico, kwiga indirimbo, guharanira amashimwe y’ubuhanga, kwiga ubumenyi bushya, ikoranabuhanga … ibyo byose ni umusanzu umwongerera ubushobozi fatizo.

2. Kurera imyitwarire no guhamya uwo uri we (ubumuntu)

Ingimbi ihamya kamere yayo mu bandi kandi ikanoza imyitwarire yayo mu mikino mpamyabutwari no gutembera ahantu itazi, ku bushake bwayo ibigiranye umuhate kugira ngo itryaze ubwenge n’ubumenyi, kubw’uburere ikesha kubahiriza amabwiriza y’imikino, kwiga gushushanya ahantu n’ibihagize, kujya mu mikino yo mu matsinda, kuyobora itorero ishingiye ku nama ziyobowe n’umutware, aho buri wese yisanzura agatanga igitekerezo cye, kandi aho buri wese afata inshingano ku bikorwa rusange byumvikanyweho.

3. Imibereho y’umubiri n’ubuzima bwa roho

Ushingiye ko muri iki gihe usanga abantu benshi baratwawe n’irari ry’umubiri n’ibikorwa by’urukozasoni, ni ngombwa gutoza ingimbi kugira imyumvire ikwiye y’agaciro k’umubiri mu mibereho ya muntu.  Umubiri ni igikoresho gihebuje cy’umurimo, cyo gufasha no kugaragaza ubucuti n’urukundo umusore afitiye Imana na bagenzi be…

Ubuzima bw’umubiri n’ubwa roho bigerwaho abakiri bato batojwe kugira isuku ku mubiri, bishingiye ku kunoza imikino ngororamubiri, kumenya kwiyubaha no kudatatira igihango, cyane cyane kumva abandi no gufatanya nabo bigaragarira mu mukino kimwe no kugaragariza urubyiruko ko urufitiye icyizere.

4. Gufasha abandi

Urubyiruko rukeneye kumva ko hari icyo rumaze. Birenze kure ibyo kwidagadura; ubuskuti ni ukwiyemeza gufasha mugenzi wawe. Kubw’igikorwa cyiza (BA), umuskuti ashishikarizwa gufasha no gutabara. Ni cyo gisobanuro cy’intego y’ubuskuti “Guhora witeguye”. Kwitabira ibikorwa by’ubutabazi, gutanga imfashanyo, gukusanya imiti cyangwa imyambaro, gutegura igitaramo cya Noheli, cyangwa cya Pasika mu bigo birera imfubyi; ibyo byose ni uburyo bufasha ingimbi kumenya kwitangira abandi, kandi bikayifasha gushyira mu ngiro ibyo yavuze. Ibyo byigisha urubyiruko kubona uruhande rwiza rw’ibiriho no gukora neza.

“Urukundo rugomba kugaragara mubikorwa kurusha amagambo” (Mutagatifu Inyasi).

5. Iyobokamana

Icyitonderwa : Iyobokamana ubwabyo si intego y’ubuskuti nkuko byifujwe n’umubyeyi w’Abaskuti Baden-Powell. Nyamara mu gihe cye, iyobokamana ryarangwaga mu bintu byose mu bihugu by’Iburengerazuba; ryari ingingo y’ingenzi muri rubanda. Birumvikana rero uwashinze Abaskuti atajyaga kwirengagiza Iyobokamana ryari rihatse ibintu byose mu gihe cye.

Ikwirakwira ry’ubuskuti mu bihugu bitandukanye ryabifashijwe n’abihayimana bashimangiye cyane “Kwemera Imana” ku buryo burenze ibyo Umubyeyi w’Abaskuti Baden Powell yifuzaga. Rero tugomba kwibutsa ko umugambi w’ubuskuti atari ukurera abazaba abapadiri, ahubwo abazaba abaturage beza b’inyangamugayo.

Ni ngombwa kureka buri mwana agahura n’Imana ku giti cye. Buri wese afite umwihariko mu mibanire ye n’Imana, kandi iyo mibanire ntishobora kugirwa itegeko cyangwa agahato. Gusa imibereho y’umuntu niyo igomba kubihamya, maze ibikorwa byacu no gusobanura impamvu tubikora bigatuma tugaragaza ko iyo mibanire n’Imana ishoboka kuri buri wese ku giti cye. Ibyo ingimbi isanga mu baskuti igomba kubyibazaho kandi ikabyakira mu myumvire yayo. Ubuskuti rero ni umukino ugizwe n’ubuzima nyirizina.

Uretse ubuhanga ubuskuti butoza, bunigisha n’uburyo bushya bwo kubaho, maze kubw’ibikorwa byabwo byose bugakuza ubumuntu, bukigisha gufasha no gukunda, bugatanga imyumvire mizima n’umubiri muzima. Mu ijambo rimwe, ubuskuti bugerageza guhindura umwana akaba umuntu wisanzuye, kandi wita ku byo ashinzwe, ufitiye igihugu akamaro akanaharanira amahoro muri rubanda.


Byanditswe : tariki ya 13 Werurwe 2017 saa 11:18:58, ubu , : 4265
Uwabitangaje : Robert Makuta

RASAL yatanze mutuelles ku baturage 205 i Musanze

RASAL yatanze mutuelles ku baturage 300 i Gikomero

Inteko Rusange ya mbere ya RASAL (Igice cya mbere)

Inteko Rusange ya mbere ya RASAL (Igice cya kabiri)

Ingando y'Abaskuti bakuze yabereye kuri Muhazi mu 2016

RASAL © 2016 - 2018
Byubatswe na Robert Makuta